VOA

 
  
 Vereinigde OelesAdjudante

 
 






2 x 11 jaor VOA, Vereinigde OelesAdjudante

De aad Oelesadjudante vereinigd in de VOA, Vereinigde Oeles Adjudante ,hebbe op 18  november 2011 eur 22 jaörig besjtaon, oftewaal  in vastelaovesterme 2 x 11 jaor, op groëtse wiéze intern gevierd.
De jubileumkemissie, die de vreeje hangk had gekrege, haet van dees vreeje hangk gebroék gemak um ‘nne fantastische aovend te organiseere
met as hoégtepunt de officiële oétreiking van de nieje VOA-ôngerschjei-ing aan de iërste initiatiefnemers van 22 jaor geleeje,  
de hiére Frans Geurts en Ger Gerards. Vurdet President Wim Beurskens kôs euvergaon toet de offisiejeele  oétreiking, waar d’n nag een verrassend waördje van Gerard Fokkens en Frank Faassen. 
In eur twiejsjpraak vertelde zeej, det de nieje ôngersjei-inge gesjponserd zien. Zeej vertelde d’r aevel neet beej door wae.  

 

Weej kieke efkes truuk in de historie.  Op aangaeve van toenmalig Oelesvors Piet Janssen woorte in 1989 alle aad-ajudante aangeschreve um te kiëke
of d’r behoefte waas ein aad-adjudantevereiniging op te richte. Met name um as aad-ajudante op ein fatsoenlijke wiés nao de receptie van ut Oelestrio te kenne gaon.
De animo waas biezônger groët met as gevolg det op 17 november 1989 in ‘t baovezaelke van café-restaurant  Lücker de oprichting ein feit woort.
Inmiddels haet de club zôn 60 actieve leeje, jôngk en aad. D’n eine vertelt det hae vur de zesde kiër opa is gewaore, de andere guëf ein rundje umdet hae net vader is gewaore.
‘t Besjteur van de vereiniging, die idder jaor met twië nieje leeje de sjnelsgreujende vereiniging binne de Oelesfemilie is,
besjteit oét prezident Wim Beurskens (adjudant in 1987), sikkertaris is Theo Thurlings (adjudant in  1991) en Geert Thissen (adjudant in 1984) penningmeister.
Waobeej nag meug waere vermeld dat Geert Thissen al vanaaf d’n alleriersten daag de cente beheerd.

’t Jaorlikse hoëgtepunt  is op vastelaoveszôndaag ‘t bezeuk aan de receptie van de nieje Oelesprins.
Maar feitelik nag nag belangriéker, ’t fillisiteere van de twië aanstaonde nieje leeje, de adjudante.
Gezamelik met de SOP, de Sociëteit Oeles Prinse en partners wuërd ut nieje Oelestrio op ein ludieke meneer gefillisieteerd.  
Zoë had ut imposante gezelschap in 1998, wie Lucas Jaspers adjudant waas (taegewaordig veurzitter van Vg. D’n Oeles) ,
bedach um allemaol met ein plefôndplaat um de nek de bühne op te gaon.
Achteraaf gén golde  ideej aangezeen de sjmokings van baove wiés ônger ônger  de pluuzels bleeke te zitte.

 

Vaerder  kump de VOA twiëje kiër per jaor beejein um te vergadere en wuërd ens per jaor ‘t ceciliafiës gevierd
waobeej  altiëd ein excursie nao ein of ander bedrief wuërd georganiseert. ’t waord “bedrief” mot me aevel ruúm neeme.
Zoé ging beejveurbeeld de excursie in 2010 nao Club Sans Soucis.  
Nao de meistal lierzaame excursie waere de diverse horecagelegenhede in Tegele en umstreke met einbezeukveriërt.

 

De vergaderinge van de VOA zien euver ut algemein ‘t  podium um sjtôm te wazele behalve as d’r ein ei gelag môt waere euver belangriéke zaake.
Den maant de prezident, vruéger met zienne asbak,  alle leeje toet kalmte en wuërd d’r serieus vergaderd.
Meiste discussie is d’r vanaaf de oprichting al euver de ôngerschjei-ing. De iërste ôngerschjei-ing in 1989 waas,
umdet de VOA d’r neet beej woel laupe as ‘nne kersbaum, ein klein maar sjiék sjpeltje.
Punt van discussie waas de te betaale priës dae oeteindelik dreejkiër zoë hoëg loog as begruét.
Pak um beet 9 jaor later en nao net zoëvuul jaore sjtraevelerie waas ‘t tiëd veur ein nieje decoratie,
door eige leeje ôntworpe, aevel allein in ‘t verkiërde materiaal gegaote, te weite aluminium .
Met as gevolg det de ôngerschjei-ing al flot doef d’r oét kwaam te zeen. Twiëje jaor later woort dit zelfde ôntwerp in ‘t zilver gegaote en bleef ‘t wat det betref jaore,
behalve de keuze van ut verbindingskettingske, röstig wiés aafgelaupe november,  tiedes de jubileumaovend, ein lang gekoesterde wins in vervölling ging.
De sjplinternieje stijlvolle ôngerschjei-ing zoog toen ‘t daagleech. 

 

Naodet op de jubileumaovend alle aanwezige adjudante door de president van de VOA, Wim Beurskens (adjudant in 1987),  
woorte vurzeen van de nieje ôngerschjei-ing ,ging idderein nag in ‘t gelid vur ‘t VOA kwartet met eur leed VOA 2 x11 jaor jôngk.
Ein bewerking op ’t vereinigingsleed det destiéds ter iëre van ‘t iërste lustrum woort geschreve en opgenaome in studio Klank,
dao wao ‘t zangtalent d’r neet  vanaaf droop maar in de iëskas waas gen fles beer miër te vinde. Idder zien eige talent.

 

D’r waar nag ein belangriék moment in ’t jubileumjaor 2011. Tiedes de naojaorsvergadering woort met algemeine sjtumme besjlaote
det de VOA maar leefs 11 kiër “vrind” is gewaore van de Stichting Optochhal Groét Venlo.
Heejmeij  ôngersjriéve de aad adjudante eur verbôngenheid met de vastelaovend in groét Venlo.
Alle aad-adjudante van Vg. D’n Oeles haope det nag hiel vuél  angere vastelaovesveerders dit initiatief zulle volge.

 

VOA, proficiat met uch jubileum.