Op vastelaoveszôndaag is Paviljoen “’t Witte Hoés op ‘t Wilhelminaplein sjmiddaags ‘t dekor van ’t niej-je, graties te bezeuke evenement “Met de fles op de tés!”
Tiédens deze middaag (deure aope vanaaf 13.30 oor) waere tösse 14.00 en 18.00 oor de vastelaovestoppers van de letse 6x11 jaor (verwiézend nao ’t Oelesjubilee-jum) gedrei-jd.
DJ Senn druëg dao zorg veur.
Gemêleerde muziek dus…. vur idderein get. Auch verhuëg d’m Baolderse zenger Coen Janssen de sjtumming in de zaal door zien repertwaar ten gehuëre te bringe.
Auch aan de jeug is gedach d.m.v. ein sjpringkösse en ’n sjnek- en sjlôkbar. Taeves ken me geneete van ein sjieke leesersjow.
Vur zitgelaegenheid is zeker gezorg en det zal prettig zien vur de minse die det ziër op priés sjtelle. Jôngk en aad zien welkom op ’t Wilhelminaplein.
De vaste bezeukers aan ’t vruugere “Zum Blauen Bock” waere heej bizônger hertelik welkom geheite.

Zaoterdaag 10 fibberwarie 2018 vingk vanaaf ôngeviër 19.30 oor de “Nach van de Kloon” plaats in vastelaovespaviljoen ‘’t Witte Hoés”.
De organisaasie-j haet wir zorg gedrage vur ’n good programma. De Toddezèk weite waal wie-me ein feesje bouwt. Daonaeve make Zjwartbroëd en ’t duo Andy & Roy eur opwachting in ’t sjoëne paviljoen op ’t Wilhelminaplein.
DJ. Remco en Oeleskepèl Tegels Blood zulle de verdere optraejes verzorge.
D’n entree-j vur dit spektakel, det wies ôngeviër 01.00 oor ‘sjnachs deurt in “’t Witte Hoés”, is gans vur niks.

’t Is inmiddels ein tradisie-j binne ’t skala van evenemente van Vg. D’n Oeles: ‘t Tegels Liedjesmatinee vur Blaage. Dees truukkiërende aktiviteit wuërt georganiseerd door de jeugkemmissie-j vur de groepe zeve en ach van de plaatselikke basissjoële. Op dônderdaag 1 fibberwarie vingk de edisie-j van 2018 alwir plaats in C.C. De Haandert.

De Tegelse basissjoële hebbe op 11 november jl. oét heng van ‘t Oelestrio 2017, ein delegaasie-j van de raod van elf en de jeugkemmissie-j ’n pakketje ôntvange vur dit liedjesmatinee vur blaage. Via de site van Vg. D’n Oeles kôste de sjoële vervolges ein veertal vastelaovesmelodie-je downloade van Bert v. Dijk en Stef Kupers.
De winnaars per sjoël zette vervolges eur beste beinke veur op dônderdaag 1 fibberwarie en battele den um de felbegeerde wisselbaeker.

In 2017 woort Hupie Schuurs van bao. De Lings de winnaar van ‘t Tegels Liedjesmatinee vur Blaage.

Vanaaf d’n dinsdaag nao ’t prinsebal is ’t gebroékjelik, det de Oeleskrant wir te koup is. Lede van ’t Oelesgezelsjap, ôngersjteund door minse van angere plaatselikke vereiniginge, zulle vanaaf de vruugen aovend van 30 jannewarie hoés-aan-hoés in Tegele, Sjteyl en oppe Hei kômme um ’t full-colour visitekaertje van Vg. D’n Oeles te verkoupe.
Vanaaf woensdaag 31 jannewarie a.s. is dees 66e edisie-j taeves te koup à 4 € beej

de Read Shop
Timmermans Lezen en Schrijven
Snackbar de Stevel
Bakker Bart
kantoërbookhandel Van Heel
Beurskens Badkamers in Tegele.

Oppe Hei is die te verkriége beej
Plus Verbeeten.

Zôndaag de 4e fibberwarie vinge in C.C. De Haandert de resepsie-js plaats van ’t groëte en kleine Oelestrio anno 2018.
’t Oeles Jeugtrio biet in de kleine zaal de sjpits aaf um 14.00 oor en det deurt wies 16.30 oor.
In de groëte zaal sjteit ’t Oelestrio vanaaf 14.30 oor klaor um de felisitasie-js in ôntvangs te neme. Toet 17.30 oor ken me die ein hèndje kômme gaeve.
De vereiniginge van de Samewerkende Tegelse Vastelaovesgezelsjappe (S.T.V.) kômme vanaaf de klok van 15.00 oor. Vur alle angere luuj liek ’t daorum versjtendig um det vur dezen tiéd te doon.

Ich bön SEM HERMANS.

En woort op 26 maart 2007 gebaore op de Keizersjtraot 27 op Sjteyl. Nôw bön ich 10 jaor en woën heej nag altiéd same met miene pap Sjeng, mam Miranda en broor Daan.
Ich bön ‘nnen echte dierevriend. Ich wandel en sjpeul den auch gaer met mien hundje Tess. Heb úm zelfs liëre voetballe! Auch boéte ken-se mich vuël vinge. Same met mien kammeräödjes ving ich ’t sjoën, um te nerfe, fikkie te sjtaoke, te sjpeule op ’t sjoëlplein en veurwerk aaf te sjtaeke. As ich binnen bön, den geem ich gaer.
Ich zit op bao. De Schalm beej juf Jesse in groep 7. Op dees sjoël heb ich auch mien twië adjudante en vriendjes Joey en Kurt liëre kenne. We sjpraeke vuël aaf en loozjeere regelmaotig beejein. ’t Gekke is, det we alle dreej totaal versjillend van elkaar zien en angere hobby’s hebbe. Det mak ’t waal sjoën, want we vervaele ôs noëts as we beejein zien.
Mien twië grôtste hobby’s zien voetballe en drumme.
Voetballe doon ich dreej kiër per waek beej JO11-2 van Sjportklöp Irene en ’s zaoterdigs sjpeule we ‘nne wedsjtriéd.
Drumme doon ich auch gaer. ’t Leefs op ’n ech drumsjtel netuurlik. Ich kriég ens per waek drumles en sjpeul iddere waek in de percussiegroep van Harmonie Sempre Avanti. Oefene daoveur doon ich thoés op zölder op mien eige drumsjtel.
En den netuurlik vastelaovend viere! Det is mich met de paplaepel ingegaeve.
Al vanaaf mien gebaorte (…..) vier ich vastelaovend en doon ich met d’n optoch mei-j. De iërste ach jaore van mien laeve waas det met vastelao-vesvereiniging “Sjots en Sjeif”. In 2016 woort mien broor Daan jeugvors Lucifer. Det jaor heb ich same met adjudant Kurt met ‘nnen eige motor de optoch mei-j geree-je met de Duuvels pliessie-j. Vurrig jaor vông ich aevel, det ’t tiéd woort um zelf met ‘n vriendje ‘nne wage te bouwe en mei-j te trekke in d’n optoch. Same met mienen adjudant Joey heb ich toen waekelangk flink geklus en leepe we mei-j tiédens de kingeroptoch op Sjteyl. Ein super sjoëne ervaring, waobeej we auch nag ens d’n iërste priés hebbe

...

Zaoterdaagaovond 27 jannewarie 2018 haet Oelesvors Gé Cornet in C.C. De Haandert tiédens ’t jaorlikse prinsebal ’t Oelestrio anno 2018 gepresenteerd. In dit 66e Oelesjaor geit Prins DON-1 WILLEMS de kômmende waeke same met zien Adjudante THIJS KONINGS en ROBERT SCHOUWENBERG veurop in de Tegelse Vastelaovend.

Al ingkele jaore wuërt de naam van Don Willems as Tegelse prins geneump in ’t plaatselikke geruchte sirkwie-j. Dat Oel;esvors Gé Cornet oéteindelik terech is gekômme beej Willems is dus gaar neet zoë vraemp.
De 40-jaorige Don Willems is eine gebaore en getaoge Tegelse jông. Hae woënt same met zien echgenote Sylvie. ’t In 2005 getrouwde sjtel haet twië kinger; dochter Julie en zoon Charly. ’t Gezin Willems woënt op vur Don hiel vertrouwde baodem, namelik in ’t elderlik hoés aan de Van Wevelickhovensjtraot.
Met huuzer haet Willems hiel get te doon, getuuge zien professie-j as makelaer. Hae is eigenaer van VeTeBe Makelaardij, det zoëwaal in Tegele (Groëtesjtraot) as in Venlo (Keuninginneplein) vestiginge haet.

Adjudant Thijs Konings (41) is auch einen op en top Tegelse jông. Gebaore in de Wingkhôngkflat en later woënechtig baove oppe Hei. Inmiddels woënt Konings same met zien Sjteylerse vriendin Sanne Hoezen aan de Boskampsjtraot. Samen hebbe zeej dreej blage: Pleun, Cato en Mauk. Al tig jaor werk Thijs beej transportbedriéf Ewals Cargo Care en is dao verantwaordelik vur de verkoup. ’t Viere van vastelaovend haet Thijs neet van vraemde. Zien èlders John & Joke Konings ware namelik in 1975 broédspaar beej de Boereraod en beej dees zelfde vereiniging mochte ze in 1992 getuuge zien beej ‘t broédspaar Bets en Huub Rutten.

Adjudant Robert Schouwenberg (45) haet auch allein maar in Tegele gewoënd. Iërs ingkele jaore aan de Plataansjtraot en daonao aan de Bôngerdsjtraot wao zien èlders sinds 1974 “De Sjtevel” besjtierden. Vanaaf 2011 is hae zelf de eigenaer van dees hiel bekende zaak, same met zien oét Belvend aafkomstige echgenote Eveline Wilbers. Same hebbe ze twië

...

‘t Niej jaor 2018 is ôngertösse al 'ne gas daag áad. Det beteikent vur vuël minse auch det ‘t vizier op de vastelaovend gerich ken waere. Aangezeen de vastelaovend in 2018 vruug velt, zulle de veurbereidinge vur d'n Tegelse optoch get sjneller op gank môtte kômme. ‘t Betröf onnag ens ‘n speciale editie. Op maondig 12 fibberwarie sjteit namelik de jubileumoptoch op ‘t program.


De optochkemissie van Vastelaovesgezelsjap D’n Oeles haet neet sjtilgezaete de letste maonde en is al 'nen hielen tiéd bezig met deze jubileumoptoch. Zeej hebbe 'n paar verangeringe aangebrach. Zoë zal in taegesjtelling toet anger jaore d'n optoch neet vertrekke vanaaf de Kerkhaoflaan. D'r is namelik gekaoze um op de Groëtesjtraot beej ‘t Witte Hóes te sjtarte, woë auch ‘t ing van de bônkte sjtoet zal zien.


Daobeej zal ’t boéte beej paviljoen “’t Witte Hoés” veur en nao d’n optoch éin groët fiës zien met as doel det de sjtraotvastelaovend truukkump in Tegele. ’t Kiosk (sjtông veurhaer altiéd op “de Langsten Daag”) op ’t Sjmidseplein geit ein hiel prominente plek inneme. Op dit kiosk immers gaon joekskapelle en einen DJ vur genôg remmiedemmie zorge. Aan de kinger wuërt zeker gedach, getuuge ’n karoussel en d’r ken tui-jke getrokke waere. Tuurlik zal d’r auch ein richtige beercarroussel sjtaon. Kiosk en Sjmidseplein waere keigezellig aangeklei-jd. Alles wuërt optimaal verleech zoëdet ’t fees in de duusternis sfeervol ken waere veurtgezatte.


Umdet ‘t ein jubileumeditie is, haop de organisatie det d'r vuël áad-deilnimmers nag ens met dóon. Daoröm is d'n optoch 2018 ömgeduip toet Optoch-reünie. Wilse dus zoëwie vruger nag ens gezellig same meitrekke, den is dit dien kans. En det is ech genne kwats, verwiézend nao ‘t motto van d'n Tegelse vastelaovend in 2018: “Wát ‘nne kwats!” Sommige áad-deilnimmers hebbe zich al gemeld. Det is hiel sjoën, maar auch niej deilnimmers hebbe zich nôw al opgegaeve. Heb geej intresse of vraoge den kent geej kontak opnimme met Marcel Engelen via Dit e-mailadres wordt

...

In naovolging op ’t oétroope van de Oelesprins tiédens ’t prinsebal, wuërt zoë-as gebroékelik ‘nnen daag later auch wir de heerser euver de Tegelse jeug door Vg. D’n Oeles bekend gemak.
Op zôndaag 28 jannewarie zal, in eine toet kojboj-saloén umgetoverde groëte zaal van C.C. De Haandert, ‘t 29e Oeles Jeugtrio waere geproklameerd..

Vanaf 14.30 oor zien de deure aope. ’t Zal, de jeugkemmissie-j en Oeles Toekoms kennende, wir eine sjoëne middaag waere vur de jeug van Tegele. De entree-j vur deze middaag bedruëg 2,50 Euro, terwiël kinger met de “Opsjtaeker 2017-2018” gratis toegang hebbe.

Tegele mak zich op vur ein jubileumfiësje. Nôw Vastelaovesgezelsjap D’n Oeles 6x11 jaor besjteit, mak auch Ut Sambal zich op vur ein jubileumfiës. ‘t Evenement vingk namelik vur d’n elfde kiër plaats in ‘t Witte Hóes. Dit laeventige en spectaculaire fiës op zôndig 11 fibberwarie 2018 haet dit jaor as thema 'Sambal on Ice'.

Um 19:30 oor zal fiëspaviljoen ‘t Witte Hóes eur deure aop make um vervolges versjillende sjpetterende optraejes óet d’n hood te tovere. Neet de minste artieste zulle namelik nao hertje Tegele aafreize um Ut Sambal on Ice wir te laote óetgreuje toet ‘n pesjtakelsjtök. D'r wuërd aafgetrap met Net Oet Bed. Dees Venlose band begôs in 2014 as coverband van Neet Oet Lottum, maar is ôngertösse óetgegreujd toet ein volwaerdige band van zes persoëne. Neet mier weg te dinke op Ut Sambal is Joekskepèl Sokkerpaek en daoröm is die auch in 2018 van de partie.

Daonao volg met ‘n boeiende lasershow, met daobeej zang van Sandor Sturbl en Mary-Jane Young, de officiële aöopening. De Belvendse Sandor, bekend as Peter Pan (van de musical met dezelfde naam) en zien vriendin deje dit seizoen met aan The Voice of Holland. Mary-Jane haet zelfs ‘t team van Ali B gehaold.

Vervolges zulle vanóet Venraoj Björn en Mieke nao Tegele kômme um de temperatuur in ‘t Witte Hóes nag wiejer op te sjtaoke. Dit duo woort in 2017 met ‘t nummer 1000 Sjterre twiëde beej ‘t Limburgs Vastelaovesleedjes Konkoers (LVK) en zal auch dit jaor met Droëme Mit De Oëge Oop hoëge ouge perbere te goëje tiédes ‘t LVK.

Beej ‘n richtig fiësje kenne Fabrizio en Big Benny netuurlik neet ôntbraeke. Ut Sambal on Ice is daoröm gruëts det die d'r allebei beej zulle zien. Alleriërs zal Fabrizio óet Mesjtreech in actie kômme um knalhits zoëwie Sjiek is miech dat, De Körk en Roetewisser te laote huëre. Daonao zal Net Oet Bed vur de twiëde kiër ‘n setje aafwerke en den is Big Benny aan de beurt. Deze Remundse geweldenaer is al jaore ‘n attractie in Limburg en wet good ‘n fiësje te bouwe.

Daomet is de kook nag

...

We zien enorm geraak door 't hiel plotseling overlijde van ôzze bizôngere kammeraod en Limburgse vastelaovekoryfee, Wiel Vestjens.
Limburg in 't algemein en Groët Venlo in 't bizônger verluus eine van zien grôtste, zoë neet de sjoënste vastelaovesmins in hert en neere. De vastelaovesmuziek zoot beej Wiel wies in de tiëne. Wat zulle we zien aansjtaekelikke persuënlikheid, zienen humor, zien liedjes, zien sjtum en ziene glimlach misse.
Noëts miër live "As de sjterre, dao baove Sjtraole"......
We zien d'r as Oeles ôntzettend gruëts op, det we Wiel in november van vurrig jaor, beej gelaegenheid van ôs 6x11 jaorig jubilee-jumfiës, nag kôste ôngersjeij-je in de hoëgste vastelaovesiër van en door Limburg, de Gouden Narrenkap.
We laeve bizônger mei-j met Wiel's echgenote en femielie-j en winse eur alle sjterkte toe beej dit groëte verlees.
Vur d'n allerletste kiër zegke weej in deepgetroffe naogedachtenis: ALAAF WIEL!
De ganse Oelesfemielie-j van Tegele.

Vastelaovesgezelsjap D’n Oeles is d’r vur alle laeftiédskattegorie-je. Op woensdigmiddig 31 jannewarie organiseert d’n Oeles daorum vanaaf 13.45 oor (zaal aope um 13.15 oor) in C.C. De Haandert ‘n zitting vur alle 55-plussers oét Tegele en umsjtreeke.

De organisaasie-j zorg d’r wir veur, det d’r ein sjoën programma is samegesjteld. Zoë zulle de buuttereedners Conny Bruijnaers, Har Daniëls en de jeugbuuttekampioen van 2017, Sem de Wilde, de bezeukers wir duchtig ‘nt lache kriége in de Haandertzaal.
Vur de muzikaal-vokale invulling zorge de bekende duo’s Sandra & Marco en Thei & Marij.

Daobeej zette dansgardes van D’n Oeles alwir eur beste beinke veur.
Gelaegenheidskepèl “Womigejoke” verzörg de muziek as ‘nne roë-jen draod.

Al met al voldoende ingrediënte vur ‘nne gezellige middaag vur de jôngere en get aaj-jere seniore van Tegele.
D’n entreej bedruëg € 4,50 en det is inklusief ’n tas kôffie met get lekkers d’rbeej. Kaertjes ken me aansjaffe beej Bakker Bart op de Kerksjtraot.

’t Oelestrio 2018 sjteit te trappele van ôngedöld um zich op zaoterdaag 27 jannewarie aan ’t Tegelse publiek te tuëne tiédens ’t Prinsebal.
’t Is neet zoëmaar ’n Trio, maar ein jubilee-jum Dreejtal umdet ’t Oelesgezelsjap 66 jaor besjteit. De sjpektakulaire ôntmaskering door Oelesvors Gé Cornet vingk plaats um 21.11 oor. De entreejdeure van De Haandert zulle vanaaf 20.00 oor aope zien, maar um 21.00 oor presiés gaon die toe.

Op dit bal traej-je naeve de eige dansgardes auch Sandra & Marco, Big Benny, Christel en Quinn en Twië kiër Twië op. DJ. Remco makt taeves zien opwachting en met ’t “Job- en Thomasfiës” zal De Haandert zônger miër op de kop waere gezatte.
Vur de sjtummige noot zorg joekskepèl Tegels Blood.

Toegangskaertjes zien à 11 Euro verkriégbaar vieja de site van Vg. D’n Oeles, www.oeles.nl
Auch zien ze te koup beej Bakker Bart op de Kerksjtraot.
Tuurlik is ’t meugelik um aan de aovendkassa nag ein kaertje aan te sjaffe.

Op de site van D’n Oeles ken-me taeves ein gokje waoge um de naam van de niej-je prins en zien adjudante te raoj-je.

 

Op zôndaag 11 fibberwarie wuërt, mede door Vg. D’n Oeles, ’t Sambal georganiseerd met as thema ‘’t Sambal on Ice”.
’t Deurt nag efkes …… en den vingk d’r op vriédaag 12 jannewarie de veurverkoup plaats van dit bal beej kefee Sintermerte.
Dae veurverkoup druëg de toepasselikke naam van “PreeParty Sambal”.
Kefee Sintermerte aan de St. Martinussjtraot äöpent de deure om 20.00 oor en ‘n oor later sjtart de offisjeele verkoup vur persoëne van 16 jaor en aaj-jer.

Tiédens dezen aovend koste de sjotjes tösse tiën en twellef oor sjlechs einen euro per sjtök.

De DJ’s Albi en Bennie drage den zörg vur gôj-je muziek.

De afgeloupe maonde hebbe de maedjes van de diverse dansgardes van ’t Oelesgezelsjap ô.l.v. eur trainsters hel geoefend vur eur niej-je krejaasie-js. Zeej sjtaon den auch allemaol te trappele um dees op zaoterdaag 9 december a.s. in De Haandert te presenteere.

De aanvang van dezen aovend vol dans en muziek begint um 19.00 oor en is vur idderein vreej toegankelik. D’r zulle twië gardedanse (mini en groëte garde) getuënd waere. Taeves sjoowe de mini, de midde en de groëte dansgroep eure niej-je sjoowdans. Behalve ’t danse vinge d’r auch diverse angere optraejes plaats, terwiël dj Braunie vur de muziek zörg.
Aan ’t eind van de gezelligen aovend veure alle groepe gezamelik nag ‘nne finaledans op.

Na dees presentaaseie-j gaon de dansgroepe alwir legio optraejes verzorge in Tegele en de regio. Heb geej auch ein leuk feesje, waobeej ’t sjoën zou zien um ein van dees dansgardes op te laote traej-je: nim den kôntak op via de Oelessite met Erwin Hermans.