Prins Ruben I en zien adjudante Florian en Thomas

Met zienen iërste Prins haet niejbakke Oelesvors Roy Peters vur ein verrassend Trio gekaoze. Ein verrassende keus in de zin van jôngk, jeugdig en daobeej eine neet gevestigde prinsenaam in ’t Tegels geruchte-sirkwie.

Aafgeloupe zaoterdigaovend 8 fibberwarie presenteerde de Oelesvors ’t Oeles-Trio 2020 in CC De Haandert tiédens ’t prinsebal. Prins RUBEN I (Linssen) geit de kômmende Vastelaovend same met zien Adjudante FLORIAN Faassen en THOMAS Vossen veurop in de plaatselikke vastelaovend.

Trio 2020

’t Niej-je Trio kump veur toét de Tegelse Hockey Club (THC). Alle dreej zien ze immers aktief lid en neme zelfs gezamelik zitting in ’t besjteur. Zoë is Adjudant Thomas de veurzitter van de vereiniging en is de Hoëgheid verantwaordelik vur ‘t cluster sjponsoring. Adjudant Florian leidt op zien beurt ’t cluster vasgood & beheer.

THC sjteit aan de veuraovend van ’n fusie met de hockeyklöps van Venlo en Bliërick toet Hockeyklöp Delta-Venlo. Drökke tie-je dus vur dit dreejtal en dao kump dus dees oétverkeezing nag ens baovenop. In ’t letste jaor van de zelfsjtandige vereiniging dus ein sjoën visitekaertje um de kleure greun en wit sjtolz te tuëne tiédens de Tegelse Vastelaovend.

Prins Ruben I (38) Linssen is gebaore op Sjteyl en woënt wir sinds 2012 in ’t elderlik hoés. Hae woënt same met zien vrouw Miek en de dreej kinger Mats (9), Linde (7) en Lasse van 3 jaor. In ’t dageliks laeve is Ruben werkzaam beej Hauzer Techno Coating in Venlo en is dao inmiddels al ruúm dreej jaor verantwaordelik vur de inkoup en logistiek.

Prins 2020

Adjudant Florian (34) Faassen is opgegreu-jd en getaoge ônger de sjaaduw van Sjatoo De Hoiltmühle in ôs sjoëne woënplaats. ’t Viere van de Vastelaovend haet-e sjpraekwaordelik met de paplaepel ingegaote gekreege. Neet gek, aangezeen vader Bart maar leefs 33 jaor prominent lid waas van de Oeles’ Raod van Elf en in 2000 de plaatselikke Vastelaovend veur moch gaon as Prins Bart I. Florian werk, net als pap Bart (al elf jaor same op éin kentoër) en broor Rowan beej ’t femielie-jbedriéf Faassen en is drök doonde met de verkoup van buim en plante. Hae woënt in ’t hoés, wao vruuger ’t vurneump bedriéf waas gevestig, same met echgenote Jessie en de twië zeuns Flip (4) en Joppe (2).

Adjudant Thomas Vossen is de benjamin van ’t sjtel met de laeftiéd van 3 x 11 jaor en is taeves ‘nne richtige Tegelse jông. Same met partner Veronique haet-e ein dochter Ize van 11 maond. In ‘t Viecuri Medisch Centrum is-e projekleider ICT. Thomas is ‘nne volle naef van d’n angere Adjudant Florian. Hae traejt in de vootsjpaore van zien vader Tom, dae in 2000 de Adjudant waas beej Prins Bart I. En zien sjoënvader Tom Quicken waas in 1992 Oelesprins!!

De gemeinsjappelikke passie van ’t Trio is, zoë-as gezag, de hockeysjport. Gezamelik traej-je ze ’s zôndigs aan in Hiëre-2 en hebbe dus taeves zitting in ’t besjteur van THC. Naeve ’t hockey is Hoëgheid Ruben ouch nag aktief bezig met zaalvoetbal en sjteit-e ’s jwingkters gaer op de latte. Met vriendegroep De Nomade wuërdt d’r idder jaor opnie-j ein sjoëne ônbekende besjtumming bezôch.  Florian en Thomas make allebei ôngerdeil oét van vriendegroep De Knape. Deze groep is bizônger aktief. Ze hockeye same met netuurlik de uuters belangriéke derde helf!! Ze gaon same op verkansie-j en viere idder jaor eur Knape-wiekend. Thomas is lid en trompettis van de bekende Tegelse joekskepèl Sôkkerpaek en is daobeej nag ‘nnen aktieve tennisser beej LTC De Kaetelberg in Venlo en lid van de “Biljardairsverein Gèn Keus”.  

‘t Motto van ‘t Oelestrio anno 2020 luudt as volg: “Weej gaon úm rake… det is neet mis; ouch met Vastelaovend houwe weej op de kis!” Deze liéfsjpreuk is ’n duudelikke verwiézing nao de hockeysjport met ein vet knipoug nao de Vastelaovend.

Zôndaagmiddig 16 fibberwarie recipieert ’t kersverse Dreejmansjap in C.C. De Haandert tösse 14.30 en 18.00 oor.

Fotografie: Aneta Martens


Aangesjlaote beej

Logo SLV nieuw

NEG logo Def

Winkelmendje

De winkelwagen is leeg