Eine groep Tegelse jônges haet zich jaore gelaeje tiédes de vastelaovend beejein gegoeijd en trooje sjpontaan op. Daomeij waas Oeles Toekoms gebaore en det is nôw óetgegreuijd toet eine groep dae neet miër weg te dinke is in d’n Tegelse vastelaovend.

Weej sjriéve vastelaovend 1996-1997. Ingkele Tegelse jônges bouwe aan de Prinsewage. Op daes bouwplaats kômme Luuk Willemsen, Luuk de Haas, Paul Smeets, Alain Sijbers en Frank Rijvers (Aad-Oeles Toekoms leeje) op ‘t ideej um einen act op te veuren op vastelaovesmaondig. De elders van ‘t miërendeil van dees jônge zoote in ‘t besjteur van D’n Oeles. Daorum ‘t volgende ludieke ideej: ‘t viéftal beeldt ‘t besjteur óet, gans in kostuum en met muts, en met vuël flauweköl.

Nao aafloup meldt Henk Faassen (Senaat-lid) zich, en zaet det de jônge heejmei door môtte gaon. Nao de vastelaovend geit de groep ‘nne kiër beejein zitte, en de gebaorte van Oeles Toekoms waas ’n feit. De groep wuërt óetgebreid met Jochem Gommans en later Gijsbert Verweij en Job Willemsen, as Nar. Belangriékste taak van Oeles Toekoms is ‘t begeleije van ‘t Jeugtrio. De groep deent as ein Raod van Ellef vur de Jeugprins en de adjudante. Oeles Toekoms is neet miër weg te dinke binne de Tegelse vastelaovend.
Net as ein echte vereiniging haet Oeles Toekoms netuërlik ouch ein besjteur. De veurzitter wuërt ‘Wingkvanger’ genump, de penningmeister ‘Centekretser’ en de Vors ‘Moélemeister’. Verder is t’r netuërlik nag de sikkertaris/notulis, oftewaal d’n ‘Tikker’, en de ceremoniemeister ‘Waegwiezer’.

De oorsjprônkelikke groep jônge is inmiddels gans óet Oeles Toekoms verdwene. As-se de laeftiéd van 25 bös gepasseerd, maag se gen deil miër óetmake van Oeles Toekoms; den sjuuf-se op nao de Oeles Toekoms Senaat. Dae groep besjteit intösse óet ein groët aantal minse, maar is verder neet actief. Oeles Toekoms is eine groep entoesijaste jônge die ‘t vastelaovend viere in ‘t blood hebbe, en hiel gaer deilnimme aan d’n Tegelse vastelaovend. In 2019 viert Oeles Toekoms eur 2x11 jeurig jubileum.

Oeles Toekoms geit met zeventien persoëne de kômmende vastelaovend in. Wingkvanger Niels Vullings, Moélemeister Stijn Clabbers, Waégwiézer Cas Mulder, Tikker Niek Goossens, Centekretser Alex Jacobs en Nar Guus Konings gaon de groep veur, verder besjteit de groep óet: Bas Cornet, Jip Hermans, Sten Kusters, Marc van Baar, Jip Gerards, Sem Daemen, Finn Daemen, Lucas Jacobs, Senn Friesen, Luc Beurskens en Levi Schouwenberg.

Eur adviseur is Paul Smeets.