Vereiniging

Tradisiej sjteit beej de vastelaovend veurop, maar taeves probeert de vereiniging in te sjpeule op nieje ôntwikkelinge, det ouch bliek óet ’t greuijend aantal jeugleeje. De vastelaovend is d’r vur jôngk en aad en vuël aktiviteite zien dao den ouch op aafgesjtump.

Vastelaovesgezelsjap D'n Oeles telt ôngeviër 150 aktieve leeje en daonaeve nag ein groët aantal meijwerkers en vreejwilligers, die d’r aan meijwerke um ’t sjoëne volksfiës in gôjje bane te leije.

Det, wie gezag, de jeug heejbeej ein belangriéke plaats innimp, getuge de jôngere-aafdeiling Oeles Toekôms, ‘t Oeles Jeugtrio, de dreej dansgroepe die ôs vereiniging telt en ‘t sjoëlebezeuk.

Maar ouch de ajere waere neet vergaete. Vastelaovesgezelsjap D’n Oeles organizeert jaorliks eine fiësaovend vur gehendikepte en ajere en verzörg of werrek meij aan zittinge in Huize Erkenkamp, Martinushof.

Op muzikaal gebied haet de vereiniging in 2001 ôngersjteuning gekrege van de Oeleskepèl 'Tegels Blood'. ‘t Prinsebal is met zien jaorlijks wisselend thema en sjoëne buun - door eige leeje en vreejwilligers gebouwd – óetgegreuijd toet ein gebeure det d’n  echte vastelaovesveerder besjlis neet meug misse. De Oeleskrant is ein visitekaertje en ’t hoëgtepunt van de vastelaovend is de sjoënen optoch door de Tegelse sjtraote met prachtige groepe en wages en ôngeviér 2000 toet 2500 deilnimmers.

Det dit alles gepaard geit met de nuëdige cente maag duudelik zién. De leeje betale netuurlik kontribusie, maar gelökkig wet Vastelaovesgezelsjap D'n Oeles zich finansjeel gesjteund door de 'Vrinde van 't Oelesriék' die jaorliks ein behuërlikke beejdrage doon. De Sjponsor-kemissie ônger ‘t motto 'Umdet Tegele uch en ôs leef is' is d’r in gesjlaag ein behuërlik aantal sjponsore te werve die ein belangriék sjteinke beejdrage um ein en anger in gôjje bane te leije. Ouch de gemeintelikke subsidiej is natuurlik ein belangriéke bron van inkomste.

Vastelaovesgezelsjap D'n Oeles is ein bleuijende, gezônge vereiniging, die same met eur zustervereiniginge De Boereraod oppe Hei en De Kaetelaers op Sjteyl ônger de vlag van 't STV - Samewerkende Tegelse Vastelaovesvereiniginge, de Tegelse vastelaovend kleur guëf.