Winnaars Vastelaovestoppers 2012

Gegevens

Gemaakt op woensdag 15 februari 2012 12:42

Basissjóel Sint Martinus wint Vastelaovestoppers 2012


Groep 7 van basisjóel Sint Martinus óet Venlo haet aafgeloupe zaoterdig
de Vastelaovestoppers 2012 gewônne.

Nao ein ôngerbraeking van zo'n dree jaor sjtreeje aafgeloupe zaoterdig
in fiëszaal Egidius Janssen te Belvend de twie beste liedjes van 't
jeugliedjesfestival van Groët Venlo t.w. Aarce, Belvend, Tegele, Bliërick en
Venlo öm de hoëgste iër van Gröet Venlo.

Volgés de zjurie waas 't liedje 'Pappegaajemaedje' óet Venlo as beste geëindigd.

De kinger kreege daoveur de veerde Giel Aerts trofee en meuge op
vastelaoveszaoterdig optraeje op de Boétegewoëne Boétezitting in Venlo.

Aafgeloupe vriedig haet de Sint Martinussjóel ouch al 't Jocus jeug
Vastelaovesliedjeskonkoers gewônne met 't zelfde liedje.

Extra verkaup Oleskrant 2012

Gegevens

Gemaakt op woensdag 08 februari 2012 08:50

Beste Oelesse en Oelessinnekes,




Ouch beej V.g. D'n OELES ôngervinge weej hinger van 't kaaje weer.

Umdét 't zoë kaad is, en det geldt veur jongk en aad, is 't ôs neet gelök um in gans Tegele

Steyl en de Hei de Oeleskrant deur aan deur te koup aan te beeje.  

Heejveur ôzze oprechte excuses.

Vanaaf Donderdaag 9 fibberwarie is de Oeleskrant te koup op ôngersjtaonde verkaup-punte:

Wilbro

Timmermans kantoor art.

Clips Haarmode

Read Shop (passage)

Bakker Bart

Opticien Het Huis (Leon Goossens)

Plus Verbeten

 't Vaerhoes (Steyl)

In Belfeld beej 100MHZ op de Sjoelsjtraot


In Venlo beej Koops Boekhandel en Para TI (womens waer) op de pronkstraot.   


 



       

  

Oelestrio 2012

Gegevens

Gemaakt op zaterdag 04 februari 2012 15:24

 
          


              OELES-TRIO 2012

              Prins Rien I  
 
     Adjudanten Martin en Ruud 



Foto's Jan Oehlen  

‘t Oelestrio  sjleit op de trôm

De leefde vur meziek löp al rúum 'n halve iëuw as roëjen draod door ´t laeve van Prins Rien I (Kolster),dae aafgeloupe zaoterdaag same met zien Adjudante Martin (Faassen) en Ruud (Smeets) woorte gepresenteerd as ’t niej-je Oelestrio van Tegele in 2012.

As peuter trômmelde de 55-jaörige hoëgheid d'r al duchtig op los en vanaaf toen is ´t sjláagwerk zien groëte passie.
In Tegele, as in de wieje umtrek, is Rien Kolster vural bekend as sjlaagwerker van de legendarische Sound Express en later de Gonzo Gang; begrippe die beej de viërtigers en fieftigers van nôw nag altiéd toet de verbeelding sjpraeke en sjoëne herinneringe oprope.
Taengewaordig  sjpeult hae beej 't gerenommeerde orkes Aparty.
Daonaeve waas hae jaorelangk lid van de hermenieë St.Caecilia en de Sjtaaf en
mede-oprichter van Joekskepèl de Beerpiép.

Prins Rien-I makde van zien hobbie zien beroep.
As mede-eigenaer van PB Music BV, eine groëthandel en distributeur  van muziekinstrumente en audio-elektronika, reis hae de ganse wereld rôngk.
Same met zien vrui-jke Tiny, wao- mei-j hae al 3x11 jaor getrouwd is, dochter Robin (25) en zoon Max (22) woënt de niej-je Oelesprins aan de Watermunt in de Tegelse wiék ‘t Maasveld.

As naozaot van wijlen Piet Kolster, dae jaorelangk 't gezich waas van de Tegelse Courant, is hae 'nne echte Bourgondiër dae van kokerelle en ein good glaas wién heldt.
Verder is hae lid van de kaokklöb CCPL óet Venlo en aangesjlaote beej 't Tegels wiéngilde Les Amis du Bon Vin.

Adjudant Martin Faassen (48) is eigenaer van MARFA Bouwaafdichtinge en Restaurasie-jwerke, ein bedriéf det hae zeve jaor gelee-je same met zien vrui-jke Marianne sjtartte.
Met eur dreej kinger Viënna (23), Romain (21) en Milan (16) woëne zeej aan de Ingersjtraot in hertje Tegele.

Adjudant Ruud Smeets (50) is vader van twië döchter, Ilona (25) en Amanda (21), en sinds inkele maonde de trotsen opa van kleindochter Vive. Ouch hae haet ein eige bedriéf, 100 Mhz Kompjoeter Service in Belvend, dét hae same runt met zien echgenote Andrea. 't gezin woënt aan de Zanksjtraot in Tegele.

De prins en zien adjudante zién alle dreej gebaore in Tegele en vorme same met eur partners ein hech vrindesjtel en nome as lid van vastelaovesklöp Gennen Haos ein paar kiër deil aan de Tegelsen optoch. 't Nieje dreejsjpan vingk zien oorsjprong in 2002, toen de twië zeuns van Prins Rien en adjudant Martin deil óetmakde van ’t Oeles’ jeugtrio: Max as Prins en Romain as adjudant.
Presiés tiën jaor nao dato wuërdt 't sjtèkske euvergedraage: in dit gevalneet van vader op zoon, maar in umgekiërde volgorde.

De ônthulling op 't Prinsebal, ditmaol in discosfeer, waas vur de nieje hoëgheid ekstra bizônger, umdét hae normaal gesjpraoke achter zien drumsjtel zit beej Aparty, de houf-act van dezen aovend. Hae had zién bèndlede wiés gemak, dét hae den op zakereis waas in 't bóetelangk.

Dét hae nôw de skepter druëg, beteikent neet dét hae zién drumsjtekskes hielemaol aan de kangk zal legke. Op vriédigaovend 17 fibberwarie sjpeult de kersverse Oelesprins op 't Veurpreuversbal in 't Witte Hóes gewuën mei-j beej de Joekspiano's; ein niej projek, det vurrig jaor in premiëre ging beej de 3-Kes.
't Nieje Oelestrio recipieert op vastelaoveszondigmiddaag  19 fibberwarie vanaaf 15.00 oor tóet 18.00 oor in 't Witte Hóes op Plein-1817 beej de St. Jozefsjoél. Eure liéfsjpreuk luudt:

”Met d'n hoempa, 'nne klep en 'n vétje van de kraom,
gaot geej door 't dáak en weej wiés op d’m baom!”




Sponsore Oeles-Trio:
http://oeles.100mhz.nl

          







          

Oelestrio Jeugd-trio 2012

Gegevens

Gemaakt op zaterdag 04 februari 2012 15:24

        
          


              OELES-JEUGD-TRIO 2012

              Prins Sten I 
 
 Adjudanten Finn en Nick


           


                                                       Sten I, 23ste jeugprins D’n Oeles

 

Sten Grimberg vormp same met zien adjudante Finn Daemen en Nick Willems ‘t 23ste jeugtrio van vastelaovesgezelsjap D’n Oeles. Zeej zien aafgeloupe zôndaag door Oelesvors Gé Cornet
óetgerope in eine volle Haandert discozaal.
 

Prins Sten I is 11 jaor, zit op basissjoël ‘t Maasveld in Tegele en woënt same met zien elders Rick, Marjon en breurke Lars op de Zwanebloem in ´t Maasveld.

Adjudant Finn is 11 jaor, zoon van Ron en Pé Daemen, woënt langs prins Sten met zien elders en broor Sem en bezuk de St.Jozefsjoël.

Adjudant Nick is 12 jaor en is woënechtig op de Veldsjtraot, same met zien elders Frenk en Astrid en zuske Rachel. Hij zit, aeve-als Sten op ´t Maasveld.            .

De twië adjudante handballe beej Eksplosion en Sten drump gaer. Same met eur dans-marietjes Fleur en Isa leij-je zeej de jôngste inwoëners van ‘t Oelesriék door de vastelaovend ônger eur motto “Weej zien Sten, Nick en Finn, vastelaovend viere zit d’r beej ôs good in”.

‘t Trio helt zôndaag 12 fibberwarie vanaaf 14.30 oor ein joeksige jeugresepsie-j in de groëte Haandertzaal.

 

 

Fotografie: Jan Oehlen
Foto’s zijn vrij van rechten, mits naamsvermelding

Vôt met Oëre

Gegevens

Gemaakt op dinsdag 10 januari 2012 21:28

Oeles-lid JEU CANJELS krieg op 12 fibberwari oétgereik de onderscheiding     

                      ‘La Derriérre avec les Oreilles’   (Vôt met Oëre) 

 

Zôndaag 12 fibberwari in KC D’n Haandert

“Jao det is Tegels.. ! en “Vôt met Oëre “

Vur d’n elfde kiër op riéj –dus ein ech ‘vastelaoves-jubiléjum’ sjteit op zôndaag 12 fibberwari, de gezellige femiliéj-daag “Jao det is Tegels” op ’t programma. Dök waere de beste iédeeje gebaore ônger ’t nuttigge van ein glaeske beër. Zoë ouch 11 jaor gelaeje. Ein sjtel vrinde waare van mening det d’r op zôndaag vur de vastelaovend in hertje Tegele weinig te belaeve veel. D’r woorte get idéeje ge-opperd. ’t Meus ‘nne gezellige daag waere met ’t leefs optraejes van artieste van Tegelse grôngk.

Toét op vandaag is de organisaasiéj d’r in gesjlaag öm genôg artieste bereid te vinge öm “vur noppes” eur meijwerking te verliëne, zoëdet d’r genne entreej geheeve heufde te waere. Daomeij waas de gezellige familiéj-daag “Jao det is Tegels..”, aafgeleid van ein aad Tegels liedje, ein feit.

Herm Gommans, de kèrtrekker/veurzitter, Jos Beurskens, Frans Gooren, Sef Houba en Huub Schell zien vanaaf ’t iërste oor beej de organisaasiéj betrôkke. Zeej waere alwir ingkele jaore beejgesjtaon door Gerard Engels , Hub Orval en Dré Schouwenberg.

“Kleine Zaal van KC d’n Haandert

Ouch ditjaor vingk dit fiës vanaaf 13.30 oor plaats in de kleine zaal van d’n Haandert. In deezen intieme zaal kump de gemoedelikke sfeer van “Jao det is Tegels’ volledig toét zien rech. Tiédes deze femiliéj-daag wuerd door lotteriej-klöp “de Toekoms” de hoëge Tegelse vastelaoves – ôngersjei-jing : “La derrière avec les oreilles”, op zien Tegels gezag de “Vôt met oëre”, oétgereik aan ‘nne persoën dae zich biézônger verdeenstelik haet gemak. Dit jaor velt dees iër te beurt aan d’n hiër Jeu Canjels. Dit kréjatieve brein haet op zakelik en maatsjappelik gebied zien sjpaore rúumsjoots verdeend. Zakelik met zien bedrief CAS Exhibitionpartners en maatsjappelik hebbe vûel vereiniginge en organisaasiés in de loup der jaore van eur deenste  gebróek meuge maake.

Rôngk de klok van 14.00 oor zal de veurzitter van lotteriej-klöp de Toekôms, Toën Smeets,  de lauréjaat huldige en um de “Vôt met Oëre” óetreike. Aansjlóetend vingk ein  korte resepsiej plaats, waonao de diverse artieste hun kunste zulle vertoëne.

Iërdere “Vôt met Oëre-dragers:

1992 Jeu Rijvers, 1993 Karel Bloemen, Sef Cremers †, Annie Dings, Sef Driessen, Jeanette Ewals †, Dré  Geraeds, Piet Kolster †, Jeu Lenen †, Har Noten , Henk Opsteegh, Wiel Poeth †, Jo van der Velden, Piet Visschers, Ad Vos, 1994 Piet Hovens, 1995 Majoor Claasen, 1996 Toën Smeets, 1997 Pesjtoër Wauters †, 1998 Mart Gommans, 1999Jan Driessen, 2000 Thei en Marij, 2001 Paul en Carla Lucker, 2002 Ben Verbong, 2003 aafgelas, 2004 Pestjoër Dautzenberg, 2005 Wim Leurs, 2006 Geert Thissen, 2007 Sef Derx, 2008 Kaetelaer Jac Thönnissen, 2009 Vg. Paaf! Roëd moos Jochem Gommans, 2010 Gerard Fokkens, 2011 Beerpiëp Jan Jacobs.


.

Vastelaoves-gedichje

Gegevens

Gemaakt op dinsdag 15 november 2011 22:36

De elfde van de elfde , 2011!

 

Dit jaor sjtaon weej heej op de buhn op ut oelesplein.

Weej, de kinger van de Lings, vinge det spannend maar auch huel fijn!

 

Wat ein ier um ut vastelaoves seizoen in te meuge sjeete, same met de prins.

Is det neet iets, wat idder kink zich wins?

 

Dit jaor is det auch nog get specialer ,

de elfde van elfde in 2011.

Det guef toch ein ech vastelaoves geveul,

vinge weej zelluf!

 

De vastelaovend sjteit beej os veurop.

De ganse sjoel, sjteit den ein waek lang op ziene kop!

 

Weej hosse en sjpringe , versiere os sjoel in vastelaoves kleure.

Nae, veur os ken de vastelaovend naet lang genog deure!

 

Plaetjes sjeete is ein hobby, op sjoel van os.

Euveral hange weej get op, de remme gaon gans los!

 

De prins, raod van ellef, sirremoniemeister en adjudant.

En auch ut dansmerietje sjteit in huel moei kant!

 

Vanaaf now kenne weej d’r no toe gaon leave.

Want det weej det gaon viere, do ken de juffrouw ech neet naeve!

 

Maar iers staon weej heej, same met uch op de elfde van de elfde.

En wille alle vastelaoves vierders ut zellefde!

 

Elf kier laote zeej det kanon now knalle.

Ich weit zeker det os det good zal gaon bevalle!

 

Laot de confetti now maar los.

Ut vastelaoves seizoen is vandaag den ech begos!

 

 

Vastelaovend same!!

Vuël iëremetaal beej seizóensäöpening Oeles

Gegevens

Gemaakt op vrijdag 11 november 2011 22:20

Vuël iëremetaal beej seizóensäöpening Oeles.




Gé Cornet, sins 2010 vors van Vg. Dn Oeles, moch aafgeloupe zaoterdaag wir vuël iëremetaal óetreike
tiédens de interne seizoensäöpening van vastelaovesgezelsjap D'n Oeles óet Tegele.

Bizôngere handeling daen aovend waas de wisseling van seremoniemeester.
Han Peters noom de funksiej euver van Bart Faassen. Bart, dae inmiddels al 14 jaor
de rol van seremoniemeister bekleide,
goof in zien wäördje aan, det hae 't volste vertrouwe haet in zienen opvolger Han Peters.

De Oelesvors had zaoterdag de hèng vol aan 't óetreike van ôngersjeidinge.
Ein van de hoëgtepunte van d'n aovond waas, zoë-as idder jaor, 't aaftraeje van 't Oelestrio.

Adjudant Ron Driessen kreeg beej zien aafsjiéd 't Zilvere Oeleskruuts,
ein ôngersjeiding die ziene kollega Bleys Reinders ouch in ôntvangs moch neme.

Prins Ed Faassen zou as aaftraejend Prins 't Gôlde Oeleskruuts ôntvange,
maar kreeg de Zilveren Oeles umge-hange als nie-j lid van de Raad van Elf.

Harrie Jacobs, Cor Janssen en Roy Peters, trooje taeves offisjeel toe toet de Raod van Elf
en krege de Zilveren Oeles umgehange.

Taegeneuver de kôms van veer niej-je raodslede sjtông 't aafsjiéd van Henk Faassen en Erwin Hermans.
Door zien groëte verdeenste vur Vg. Dn Oeles kreeg Henk Faassen 't iërste Bronze "Commandeurskruuts" óetgereik. 
 
Oeles' Toekoms môs dit jaor van ein lid aafsjiéd neme.
Romein Faassen kreeg daoveur 't Zilvere Oeleskruuts.

De Oelesgarde noom aafsjiéd van Denise Jaspers, Noortje Stoffels, en Manon van der Ven.
Viéf niej-je kwame in eur plaats; nl. Marceline Collin, Danielle Driessen, Sjuul Kuntzelaers, Milou van Lier
en Renee Reitsma.
Aevenas de niej-je lede van Oeles' Toekoms woorte zeej ôngersjeij-je met de Roeien Oeles.

B eej Oeleskepèl Tegels Blood ware gen mutasies dit jaor.

Zoë-as ider jaor waren d'r ouch jubilarisse.
Besjteurslid René Boermans en kemmissie- voorzitter Rob Holten, alletwië elf jaar lid,
ôntvinge de Zilvere Oelesspeld.

Jos de Haas en Hans Janssen woorte vanwaege eur 22-jaorig lidmaatsjap ôngersjeij-je met de Gôlde Oelessjpeld.

D'n aovond had een luchtig en plezeerig karakter, wat taeves aangif det Vg. D'n Oeles klaor is vur 't niej-je vastelaovesseizoen.

Insjeete vastelaovesseizoen 2012 in Tegelen

Gegevens

Gemaakt op zondag 06 november 2011 15:29

Insjeete vastelaovesseizoen 2012 in Tegelen.


In Limburg is 't al jaorelangk ein tradisie det op d'n ellefde van d'n ellefde 't nieje vastelaovesseizoen wuërd ingesjaote.
Maar in de meiste plaatse hebbe de minse al kenne preuve aan de vastelaovend. Auch in Tegele.
Vurrige maond woort namelik al 't jaorlikse liedjesmatinee gehaaje. En det met vuël succes.
'T insjeete is vur D'n Oeles, de Kaetelaers en de Boereraod de ierste activiteit in 't nieje seizoen ônger de vlag van 't STV, oftewaal de saamewerkende Tegelse Vastelaovesvereiniginge.

In 't begin van d'n aovend kômme de Samewerkende Tegelse Vastelaovesgezelsjappe (STV) beejein in de café's Quatre Bras, 't Poshoés, de Aaj Mert, Staccato en Coëba.
Van dao oét gaon zeej, saame met eur zustervereniging De Beerpiëp rôngk 19.00 oor ônger begeleiding van inkele joekskapelle in optocht nao 't Oelesplein.
Vur diegeene die neet weite wao det presies is, 't Oelesplein is op de kruútsing van de Bergsjtraot, Ingersjtraot en Pôshoéssjtraot.
Alle vastelaovesvierders van Tegelen, Steyl en de Hei zien van herte oétgenuëdigd um zich beej deeze optoch aan te sjloéte.
Op 't Oelesplein aangegekômme is 't hiel versjtendig um ein good plaetske te zeuke, op veilige aafsjtangk van 't Oelesgesjöt, det auch dit jaor wir hiel good bewaak wuërdt door de Garde Tegeliers.
Vurdet 'nne aafgevaardigde van 't college van Börgemeister en Wethaajers um presies 19.33 oor 't ierste sjot zal losse, oftewaal 't kenon zal laote knalle, ken 't publiek iers nag loestere nao ein paar welkomswaördjes en ein gedich, veurgedraage door 'nne lierling van de liëgere sjoël .
Auch waere de nieje Tegelse sjlagers gezônge. Netuurlik wille tössendoor auch de joekskapelle Tegels Blood, de Kaetelaers en de Boerejoekskapel laote huëre det zeej in de aafgelaupe zomer good geoefend hebbe.
Nao de letste kenonsjlaag kump d'r nag ein saluutsjot door 't regiment Frei-Husaren von Glasenapp 1760.

Nao 't insjeete gaon de aanwezige vastelaovesgezelsjappe in optoch nao cultureel centrum de Haandert,
wao vanaaf 20.30 uur de nieje Tegelse vastelaoves-cd wuërdt geprissenteerd.
De liedjes op de cd waere netuurlik auch live gezônge, zoë auch 't winnende liedje van 't Tegelse Liedjesmatinee vur Blaage.
Daonao wuërdt d'r ônger de sjoëne klangke van de joekskapelle van de Boereraod, de Kaetelaers en D'n Oeles geproos op 't nieje vastelaovesseizoen.

De KOMPANE winnaars liedjesmatinee 2011

Gegevens

Gemaakt op maandag 03 oktober 2011 22:56

"Laeve in de brouwerie"

winnaar van het liedjesmatinee in Tegelen.






Foto: Jos Verbong



In einem bômvollen Haandert haet zôndaagmiddaag 2 oktoëber 't liedje "Laeve in de brouwerie" gewônne in 't Tegels Liedjesmatinee.
(gezônge door "De Kompane" en gesjreve door Funs Jansen en Paul Cartigny.

As nummer twië is het liedje "Op de kneen veur Marleen"geëindig, gezônge door Peter Meijboom en Marcel Driessen en gesjreve door Wim Roeffen en Marcel Driessen.
De derde plaats woort toebedeild aan "As d'r eine euver is".
Dit woort gepresenteerd door Leo de Ronde en Paul van Dijk
en is op pepeër gezatte door Resi, Ruth en Jeanne.

En as veërde eindigde 't liedje "Sjmienk oppe sjnoét".
Dit woort gebrach door de dames Yvonne Rijs en Mariska Reer, det ouch de teks schreef
en is gecompo-neerd door Mark Verhaegh en Wouter Frencken.

Dees veër nummers waere opgenaome opgenaome op de niej-je vastelaoves-cd van Tegele,
aangevuld met 't winnende "liedje vur blaage" met d'n titel
"Weej viere vastelaovend" , gezônge door liërlinge van basissjoël "De Schalm",
ônger de naam Top 7. Alle sjtökke waere opgenaome bij sjtudio A-recordings in Stein.

De niej-je cd wuërt op de 11e van d'n 11e gepresenteerd in de Haandert
en vervolgens in diezelfde waek vanaaf 14 november in Tegele, op Sjteyl en op de Hei
hóes-aan-hóes te koup aangebaoje wuërt vur 12 euro.

 
  

 

 

 

 

 

 

 

 

 

 

 

 

 

 

 

 

 

 

 

Dree daag zjwaaje

Gegevens

Gemaakt op dinsdag 13 september 2011 12:48

Dreej daag zjwaaje!

Vastelaoves geschiedenis Tegelen 1850 - 1950

In samewerking met Vastelaovesgezelsjap D’n Oeles haet auteur Jos Wolbertus
de vastelaovend euver de periode 1850-1950 in kaart gebrach.

Dit prachtige book haet as titel “Dreej Daag Zjwaaje” meijgekrege.
Geej kent dit unieke exemplaar now verkriege in ein
gelimiteerde oplage gedrökte edisie.

Door euvermaking van ein bedraag van € 18,95 ziet geej verzekerd
van de koup van dit unieke bookwerrek euver de Vastelaovesgesjiedenis
van Tegele met diverse noëts oétgebrachte illusjtrasies.
 
Geej kent dit book besjtelle door ein mail  met uche naam, adres en tillifoonnr.
te sjteure naor Dit e-mailadres wordt beveiligd tegen spambots. JavaScript dient ingeschakeld te zijn om het te bekijken. .
Vervolgés ves 18,95 euvermake t.n.v Faassen ôngervermelding van uche naam
op raekeningnr. 1905.02.215

 Ouch kent geej daoveur keeze dit book beej uch thoes te laote bezörge.
 Vur mier info kiek op www.3daag.nl.